हेमराज शर्मा
दाङ – घोराही उपमहानगरपालिका सामाजिक विकास महाशाखाको आयोजनामा उपमहानगरपालिका भित्रका विषयगत शिक्षकहरुका लागि आइसिटी तालिम दिन शुरु गरिएको छ । मुख्यमन्त्री शैक्षिक सुधार कार्यक्रम अन्तर्गत आधारभूत र माध्यामिक तहमा अंग्रेजी र सामजिक विषय अध्यापन गराउने शिक्षकहरुलाई आज शुक्रवार देखि ५ दिने तालिम दिन शुरु गरिएको उपमहानगरपालिकाले जनाएको छ ।
तालिम उदघाटन सत्रमा बोल्दै घोराही उपमहानगरपालिकाका प्रमुख नरुलाल चौधरीले शिक्षकको ज्ञान र सीपलाई समय सापेक्ष बनाउनका लागि तालिम दिन थालिएको बताउनुभयो । शिक्षक भनेको शिक्षा विकासको साधन भएको भन्दै उहाँले शिक्षालाई प्रभावकारी बनाउन शिक्षकलाई सिप र प्रविधिमैत्री बनाउन जरुरी भएको बताउनुभयो ।
शिक्षकलाई समाजले ज्ञानको खानीका रुपमा बुझेको भन्दै उहाँले त्यसलाई अझ बढी प्रभावकारी बनाएर विद्यार्थीको बिचमा लैजाने जिम्मा पनि शिक्षकको भएको बताउनुभयो । सामुदायिक विद्यालयका शिक्षक दक्ष र अनुशासीत भएपनि विद्यालयको व्यवस्थापन पक्ष सवल नहुँदा सोचे जस्तो उपलब्धी हासिल हुन नसेको बताउनुभयो ।
कार्यक्रममा बोल्दै उपप्रमुख हुमाकुमारी डिसीले शिक्षण सिकाई कार्यलाई रोचक र प्रभावकारी बनाउनका लागि पनि प्रविधिमैत्री सिकाई आवश्यक परेको बताउनुभयो । उहाँले सिकाईलाई दिगो र प्रभावकारी बनाउनका लागि अब प्रविधिमैत्री सिकाई प्रक्रिया थालिएको बताउनुभयो ।
घोराही उपमहानगरपालिकाका प्रमुख प्रशासकिय अधिकृत भोजराज घिमिरेले अब शिक्षालाई फिजिकलबाट डिभिटल बनाउने गरी उपमहानगरपालिकाले शिक्षकको क्षमता विकासमा लागि परेको बताउनुभयो । समयको परिवर्तनसंगै विद्यालयमा सिकाउने प्रक्रियामा पनि परिवर्तन गर्न जरुरी परेको भन्दै उहाँले अब शिक्षकले कक्षागत प्रस्तुतीको परम्परागत ढाँचा फेर्न जरुरी रहेको बताउनुभयो ।
कार्यक्रममा बोल्दै मुख्यमन्त्री शैक्षिक सुधार कार्यक्रमका जिल्ला संयोजक बसन्त चौधरीले शिक्षकलाई नयाँ प्रविधिबारेमा सिप सिकाएर सिकाई प्रक्रियालाई प्रभावकारी बनाउनका लागि कार्यक्रमले सहयोग गरिरहेको बताउनुभयो ।
घोराही उपमहानगरपालिका सामाजिक विकास महाशाखाका प्रमुख बिनोद गौतमको स्वागत मन्तब्यबाट शुरु भएको कार्यक्रमको सहजीकरण सामाजिक विकास महाशाखाका बिपना बर्तौलाले गर्नु भएको थियो । तालिममा ८० जना बढि शिक्षकहरुको सहभागिता रहेको छ ।
प्रतिक्रिया दिनुहोस्