लमहीको मजगाउँमा माघ सांस्कृतिक महोत्सव

दाङ – लमही नगरपालिका – ३ को आर्थिक सहयोग तथा थारु साहित्य– संस्कृति प्रतिष्ठानको आयोजनामा माघ सांस्कृतिक महोत्सव कार्यक्रम सम्पन्न भएको छ ।

महोत्सवमा थारु समुदायको मौलिक कला, संस्कृति र भेषभूषा झल्किने विभिन्न सांस्कृतिक नृत्य प्रस्तुत गरिएको थियो । कार्यक्रममा थारु समुदायका स्थानीय कलाकारहरूले परम्परागत नाच प्रस्तुत गर्दै दर्शकहरूको मन जितेका थिए ।

महोत्सवमार्फत थारु समुदायको पहिचान, भाषा, संस्कृति तथा परम्पराको संरक्षण र प्रवर्द्धनमा सहयोग पुग्ने आयोजकको विश्वास रहेको छ । स्थानीय तहको सहकार्यमा आयोजना गरिएको यस किसिमका सांस्कृतिक कार्यक्रमले समुदायबीच आपसी सद्भाव र सांस्कृतिक चेतना अभिवृद्धि गर्ने अपेक्षा गरिएको छ ।

लमही नगरपालिका वडा नम्बर ३ ले आयोजना गरेको माघ महोत्सव कार्यक्रममा बोल्दै लमही नगरपालिकाका प्रमुख जोगराज चौधरीले आफ्नै संस्कार र संस्कृतिलाई कहिल्यै भुल्न नहुने बताएका छन ।

प्रमुख चौधरीले संस्कार र संस्कृति नै समुदायको पहिचान भएको उल्लेख गर्दै यसलाई संरक्षण र प्रवर्द्धन गर्नु सबैको साझा दायित्व भएको बताए । उनले आधुनिकतासँगै आफ्ना मौलिक परम्परा, भाषा र संस्कृतिको जगेर्ना गर्न आवश्यक रहेको धारणा राखे ।

कार्यक्रममा उनले यस्ता सांस्कृतिक महोत्सवले नयाँ पुस्तालाई आफ्नै संस्कृतिप्रति आकर्षित गर्ने विश्वास व्यक्त गर्दै स्थानीय तहले सांस्कृतिक पहिचान संरक्षणका लागि निरन्तर सहयोग गर्ने प्रतिबद्धता समेत जनाए ।

संस्थाका अध्यक्ष छविलाल कोपिलाको अध्यक्षता तथा लमही नगरपालिकाका प्रमुख जोगराज चौधरीको प्रमुख आतिथ्यता, लमही नगरपालिका -३ का वडा अध्यक्ष मनोज कुमार चौधरी, वडा नम्बर १ का वडा अध्यक्ष दामोदर पौडेलको विशिष्ट आतिथ्यतामा कार्यक्रम भएको हो । वडा नम्बर ३ का सदस्य सुमन कुमार अधिकारीको स्वागत मन्तव्य रहेको माघी महोत्सवको संचालन यम चौधरीले गरेका थिए ।

सो क्रममा स्थानीय लक्ष्मी चौधरी, वडा नम्बर ३ का वडा सदस्य कृष्णा गिरी, नेपाल पत्रकार महा संघ लुम्बिनी प्रदेशका सदस्य ओम प्रकाश गुप्ता, वडा नम्बर ३ का वडा सचिव आनन्द योगी, फल्कापुरका कट्कन्दार पुनाराम चौधरी, वडा नम्बर ३ का वडा अध्यक्ष मनोज कुमार चौधरी लगायतले शुभकामना मन्तव्य राखेका थिए ।