नेपाली कांग्रेसको जित हुने आधार केवल चुनावी नारामा सीमित छैन; यो व्यवहारिक राजनीति, संगठनात्मक संरचना र जनअपेक्षासँगको सम्बन्धमा निर्भर हुन्छ। सत्य र तथ्यगत रूपमा हेर्दा कांग्रेसको जित सम्भावित बनाउने प्रमुख आधारहरू यस प्रकार देखिन्छन् :
ऐतिहासिक विश्वसनीयता र लोकतान्त्रिक विरासत
नेपाली कांग्रेस नेपालको सबैभन्दा पुरानो लोकतान्त्रिक पार्टी हो । २००७ सालको प्रजातान्त्रिक आन्दोलनदेखि २०६२/६३ को जनआन्दोलनसम्म कांग्रेस अग्रपंक्तिमा रहँदै आएको इतिहास छ। यसले कांग्रेसलाई ‘लोकतन्त्रको संरक्षक’ भन्ने छवि दिएको छ, जुन अझै पनि ठूलो मतदाता वर्गमा प्रभावकारी आधार बनेको छ ।
देशव्यापी संगठन र कार्यकर्ता सञ्जाल
कांग्रेसको सबैभन्दा बलियो पक्ष यसको संगठनात्मक संरचना हो । गाउँ तहदेखि केन्द्रसम्म फैलिएको स्थायी संगठन, प्रशिक्षित कार्यकर्ता र स्थानीय नेतृत्वको उपस्थितिले कांग्रेसलाई अन्य दलभन्दा फरक बनाएको छ । सामाजिक सञ्जालमा केही दलहरू प्रभावशाली देखिए पनि कांग्रेसजस्तो जरा गाडेको संगठन धेरैको छैन ।
मध्यमार्गी राजनीति र सन्तुलित विचारधारा
कांग्रेस न त चरम वामपन्थी हो, न त अतिवादी राष्ट्रवादतर्फ झुकेको छ । यसले लोकतन्त्र, निजी क्षेत्रको भूमिका, मानवअधिकार र सामाजिक न्यायलाई सँगसँगै समेट्ने मध्यमार्गी नीति अवलम्बन गर्दै आएको छ, जुन नेपाली समाजको बहुल चरित्रसँग मेल खान्छ ।
ठूला दलहरूप्रतिको जनअसन्तुष्टिमा ‘कम खराब विकल्प’
हाल सबै प्रमुख दलहरूप्रति जनविश्वास घटेको अवस्था छ । तर एमाले र माओवादीको तुलनामा कांग्रेसलाई धेरैले ‘कम खराब विकल्प’का रूपमा लिने प्रवृत्ति देखिन्छ । यही मनोविज्ञान चुनावमा निर्णायक बन्न सक्छ ।
स्थानीय तह र विकाससँगको प्रत्यक्ष सम्बन्ध
कांग्रेसका धेरै स्थानीय जनप्रतिनिधिहरू सडक, खानेपानी, शिक्षा, स्वास्थ्यजस्ता आधारभूत विकाससँग प्रत्यक्ष रूपमा जोडिएका छन । यसले मतदातासँग प्रत्यक्ष सम्बन्ध कायम गर्न सहयोग पुर्याएको छ ।
गठबन्धन राजनीतिमा लचकता
कांग्रेस गठबन्धन बनाउन सक्षम र व्यवहारिक दल मानिन्छ । वाम गठबन्धन कमजोर हुँदा वा टुट्दा कांग्रेस केन्द्रमा उभिएर सत्ता राजनीतिमा निर्णायक भूमिका खेल्न सक्छ ।
नयाँ पुस्तामा पुनःविश्वासको सम्भावना
युवापुस्ता कांग्रेसबाट निराश भए पनि अन्य दलप्रति झनै बढी निराश देखिन्छ । कांग्रेसभित्र सुधार, पारदर्शिता र नयाँ नेतृत्व आउने संकेत देखिन थालेमा युवामतदाता पुनः आकर्षित हुन सक्छन ।
प्रतिक्रिया दिनुहोस्