दाङ – वडा प्रहरी कार्यालय लमहीका प्रमुख प्रहरी निरीक्षक रोशनराज पाण्डेयको सरुवा भएको छ । नेपाल प्रहरीको नियमित सरुवा अन्तर्गत प्रहरी निरीक्षक पाण्डेको सुदूरपश्चिम प्रदेश प्रहरी तालिम केन्द्र दिपायल डोटीमा सरुवा भएको हो । करिब चौध महिनादेखि लमहीमा कार्यरत रहँदै आएका पाण्डेयको आफ्नो कार्यकालमा शान्ति सुरक्षा, अपराध नियन्त्रण तथा समुदाय प्रहरी सम्बन्ध सुदृढीकरणमा महत्वपूर्ण योगदान छ ।
लमहीमा कार्यरत रहँदा प्रहरी निरीक्षक पाण्डेयले अपराध नियन्त्रणलाई प्रभावकारी बनाउनुका साथै समुदायसँगको सहकार्यलाई विशेष प्राथमिकतामा राख्नुभएको थियो । स्थानीय नागरिक, जनप्रतिनिधि, राजनीतिक दल तथा विभिन्न संघसंस्थासँग निरन्तर समन्वय गर्दै उहाँले सुरक्षा व्यवस्थापनलाई थप मजबुत बनाउने प्रयास गर्नुभएको थियो । उहाँको नेतृत्वमा वडा प्रहरी कार्यालय लमहीले विभिन्न सुरक्षा चुनौतीहरूलाई सफलतापूर्वक सामना गरेको स्थानीय सरोकारवालाहरू बताउँछन् ।
विशेषगरी गत भदौ २३ र २४ गते देउखुरी क्षेत्रमा भएको जेनजी आन्दोलनका क्रममा प्रहरी निरीक्षक पाण्डेयले प्रदर्शन गर्नुभएको साहस, संयमता र नेतृत्व क्षमतालाई अहिले पनि स्मरण गरिन्छ । आन्दोलन उग्र बन्दै जाँदा विभिन्न सरकारी कार्यालय तथा सार्वजनिक सम्पत्तिमा आगजनी, तोडफोड र क्षति पुग्न सक्ने अवस्था सिर्जना भएको थियो तर प्रहरी निरीक्षक पाण्डेयले आन्दोलनकारीसँग संवाद, समन्वय र धैर्यपूर्ण व्यवहारमार्फत परिस्थितिलाई नियन्त्रणमा राख्न महत्वपूर्ण भूमिका खेल्नुभएको थियो ।
उक्त आन्दोलनका क्रममा उहाँ स्वयं अग्रपंक्तिमा खटिएर भीडलाई सम्झाइबुझाइ गर्दै सरकारी कार्यालय, सार्वजनिक संरचना तथा नागरिकको सम्पत्तिको सुरक्षा गर्न सफल हुनुभएको थियो। सम्भावित ठूलो क्षति टार्न उहाँले खेलेको भूमिकालाई स्थानीय राजनीतिक दल, नागरिक समाज, उद्योगी व्यवसायी तथा सर्वसाधारणले उच्च मूल्यांकन गरेका छन् ।
प्रहरी निरीक्षक पाण्डेयको कार्यशैलीलाई व्यावसायिक, जिम्मेवार र परिणाममुखी रूपमा लिइन्छ । कठिन परिस्थितिमा पनि शान्तिपूर्ण ढंगले समस्या समाधान गर्ने क्षमता, समुदायसँगको निकट सम्बन्ध तथा निष्पक्ष सुरक्षा व्यवस्थापनका कारण उहाँले स्थानीय जनमानसमा छुट्टै छाप छोड्न सफल हुनुभएको थियो ।
यसअघि कपिलवस्तु जिल्लामा भएको साम्प्रदायिक विवाद तथा तनावपूर्ण अवस्थाको व्यवस्थापनमा समेत उल्लेखनीय भूमिका निर्वाह गरेको भन्दै उहाँ नेपाल प्रहरीबाट सम्मानित हुनुभएको थियो । विशेष सुरक्षा जिम्मेवारी सफलतापूर्वक सम्पन्न गरेको योगदानको कदरस्वरूप नेपाल प्रहरीका प्रमुख दाङ बहादुर कार्कीबाट समेत उहाँ सम्मानित हुनुभएको थियो ।
प्रहरी निरीक्षक पाण्डेयको सरुवासँगै वडा प्रहरी कार्यालय लमहीको नेतृत्व अब प्रहरी निरीक्षक रमेशकुमार तिमिल्सिनाले सम्हाल्ने हुनुभएको छ । तिमिल्सिना हाल जिल्ला प्रहरी कार्यालय स्याङ्जाको अपराध अनुसन्धान तथा नियन्त्रण शाखामा कार्यरत रहनुभएको थियो ।
लमही क्षेत्रका नागरिक तथा सरोकारवालाहरूले प्रहरी निरीक्षक पाण्डेयको आगामी जिम्मेवारी सफलताको शुभकामना व्यक्त गर्दै उहाँले लमहीमा पुर्याएको योगदानको उच्च सम्मान गरेका छन ।
प्रतिक्रिया दिनुहोस्